هتخرب اكتر من كده ايه !!
أخبار متعلقة
شفت بقى يا حمادة هتخربها اكتر من كده ايه … بالذمه هي المشرحه ناقصه قتله ..تعليم وخربته صحه ومفيش جنسيه وعايز تاخدها بنزين وغليته ومعارضه ضيعتها وفلوس من الناس الاغنياء عمال تاخد منهم زي ما يجيبك مزاج شويه تشيل الدعم وشويه تغلي الاسعار ده انت لو كافر يا اخي مش هتعمل كده هيتشووا بيها فى نار جهنم لكنهم يستهينون !. ويحسبونه هينا وهو عند الله عظيم!
انا حزينه من كل قلبي مفيش حاجه توحد ربنا يا حماده عايز تسيبها في حالها كانك حالف كل حاجه لازم تخربها وتقعد على تلها بالذمه دي يرضي مين … صديق صحفي مخلص حكالي حكايه خليت عنيا تدمع على حال البلد اللي وصلناله بسببك انت يا حماده الصديق المخلص سمعني مكالمه ليه مع الناشط السياسي حازم عبد العظيم وهو بيشتكيله من جبهة ممدوح حمزه والخناقات اللي فيها على مين يقود ومين يبقى الواجهه بتاعتهم بعد اجتماع يوم الاربع وبيقلوا كمان الناس دي زي الكهنه مفكره كلامها منزل مبتحبش اللي يعارضها واللي يخالفها في الراي بتزيحه من طريقها والصحفي حزن هو كمان على حال المعارضه بتاعتنا اللي كنا حطين عليها الامل الاخير مشكلة كبيرة يا حمادة وقعنا فيها انهم اصحاب مبدأ إمساك العصا من المنتصف أو حل المشاكل بكلمتين هو ده بالنسبالهم الذكاء السياسى، فهذا فى رأيى هو الغباء الشفتشى الذى يخدع صاحبه فلا يرى عواقبه الوخيمة إلا عندما يحتاج للآخرين فلا يجدهم جراء مواقفه المتخاذلة معهم..
يا حماده مبقاش فيها اي حاجه حلوه يا حماده كل حاجه بعمايلك خربتها انا كنت فاكره ان فيه قلة قليلة من السياسيين أمناء حذروا من هذا الأمر من اتباع سياسه منتصف العصا والجري وراء المناصب والكراسي والمصالح الشخصيه دول بقوا زيك يا حماده كلهم كلا يبكي على ليلاه واللي بيضيع في الاخر البلد هتخربوها اكتر من كده ايه … والله العظيم حاجه تحزن البلد خلاص خربت هو مفيش امل يأما نبقى دولة سلفية وكداهوان، ياما نلعب بمدة الرئاسة ونضيع المعارضه بتاعتنا عشان نرضى بالامر الواقع يا حماده !!
طب تصدق بالله يا حمادة؟.. والله العظيم، ثلاثة بالله العظيم، خمستاشر بالله العظيم انت ممكن تغزو العالم يا حمادة وتبقى سيد سيده وتبقى دوله محترمه بمؤسسات ومعارضه محترمة بس نقول ايه انت عامل زي الغراب مبتجيبش معاك غير الفقر والخراب .. كفايا بقى
عارف يا حماده لو عندك نيه تصلحها متحاولش الموضوع اصله صعب وبقى مستحيل بشكل متتخيلوش ده مطلوب حكومة جادة وإرادة سياسية ومعارضه تقف في وش التخين ومتجيبش ورا لذلك يا حمادة انظر حولك وفكر و خليك سهل وحِرك ناوى تخربها اكتر ولا هتقف على كده .
نخشى الوقوع اكتر من كده نرجع لوقت الاخوان بس يا خساره الاخوان معرفوش يخربوها زيك ملحقوش يا حماده وكان عندنا معارضه بيضرب بيها المثل مكنتش بتتخانق ولا بتشتم بعضها ولا بتسجل لبعض في التليفونات مكنش عندنا معارضه بتمثل المعارضه عشان اهوائها ومصالحها الشخصيه ولا طمعانه ان جهاز سيادي يحن عليها ويكلمها ويحتويها بالذمه ده كلام يوحد ربنا يا حماده ..
الوضع الحالي اللي انت السبب فيه هيودي البلد كله للهاوية اصل بالغباوة دي انت لو قاصد ان يتم إسقاط الدولةوالله ما هتعمل كده يا حماده الاعلام بقى صوت واحد البرلمان ملكك تحركه كما تشاء معارضه مش فالحه غير انها تعارض بعضها وتكسر في نفسها