وجه محمد الدماطي عضو مجلس إدارة النادي الأهلي عدة رسائل للجماهير، مناشدًا إياهم بالحضور بكثافة في المباريات الحاسمة المقبلة بالدوري المصري.
ويستعد الأهلي لمواجهة زد والمقرر إقامتها على استاد القاهرة الدولي في التاسعة والنصف مساء السبت ضمن منافسات الجولة الـ20 من الدوري الممتاز.
وكانت رابطة الأندية قررت زيادة الحضور الجماهيري في المباريات المقبلة من الدوري إلى 40 ألف مشجع.
للتعرف على جدول ترتيب الدوري المصري اضغط هنا
وكتب الدماطي عبر صفحته الشخصية على موقع “فيس بوك”: “عكس ما ناس كتير متخيلة، أنا سعيد جدًا أن موضوع الحضور الجماهيري في مباريات الدوري اتفتح، الحراك والكلام أحسن من التكتيم”.
وأضاف: “طالما الموضوع اتفتح جمهور الأهلي هيعمل الصح وسيدعم النادي، معنديش أدنى شك في ذلك”.
وأكمل: “مفيش حد بيحب الأهلي أكثر من جمهوره، وليس لدي شك أن كل المشاكل سيتم حلها واحدة واحدة، وفي الآخر كلنا سنفرح إن شاء الله، وأكيد مقدر كل وجهة نظر ومتقبل أي نقد مهما كان، كلنا هدفنا نشوف الأهلي في أحسن مكان”.
الدماطي: عدم رضاك على الإدارة ليس مبررا لضعف حضور الجمهور
وكان عضو إدارة الأهلي وجه رسالة أخرى، اليوم الجمعة، وقال فيها: “مهما كان درجة عدم رضاك عن الإدارة أو الفريق أو أي شيء، هذا ليس مبررا أبدًا لضعف الحضور الجماهيري في مباريات حاسمة في الدوري، لو هي ظاهرة عامة ممكن أقول فقدان شغف، أو مشاكل مع الجمهور، لكن لما يبقى الحضور كامل العدد في ماتشات أفريقيا وعدد قليل جدًا في مباريات الدوري يبقى إيه السبب؟، هل بنوصل رسالة للاعبين أن الدوري مش مهم، مفيش أي مبرر منطقي للتفاوت دا بين مباريات أفريقيا والدوري، ومش هندفن راسنا في الرمل ونعمل مش واخدين بالنا، كل البطولات مهمة، والتواجد الجماهيري بيحسن الأداء، أنا على مدار عمري كنت أكتر فترة لازم أبقى موجود فيها في المدرج والفريق محتاجني عشان يكسب”.
وأضاف: ” نريد أن نقفل على نفسنا شهرين بس، نركز مع حاجة واحدة إننا ندفع فرقتنا للأمام لحد آخر الموسم، نشجع ونروح الاستاد، ونسيب أي انتقادات على جنب دلوقتي عشان مش مهم الأشخاص، محدش هيفتكر حاجة غير البطولات في الآخر، المهم الأهلي، الأهلي وبس، كل حاجة لسه في إيدينا، وإن شاء الله ربنا هيكرمنا في الآخر”.