بعث وسام أبو علي، مهاجم نادي كولومبوس كرو الأمريكي، رسالة وداع إلى جماهير النادي الأهلي بعد رحيله عن صفوف الفريق.
وأعلن النادي الأهلي رحيل وسام أبو علي عن صفوف الفريق صوب كولومبوس الأمريكي، خلال فترة الانتقالات الصيفية الجارية.
وجاءت رسالة وسام أبو علي، على حسابه الرسمى على موقع التواصل الاجتماعي إنستجرام كالتالي:
“جماهير النادي الأهلي العظيمة، جاء الوقت لكتابة هذه الرسالة الصعبة”.
“أولاً، عاوز أشكر رئيس النادي محمود الخطيب ومجلس الإدارة اللي وقفوا جنبي من أول يوم لآخر لحظة، ووقفاتهم الإنسانية اللي مش هنسى منها لحظة، وفضلهم عليا كبير بعد ربنا، وأشكر الكابتن سيد عبدالحفيظ اللي دايمًا كان بيطمن عليا قبل أي حد، وأشكر كل مدرب اشتغلت معاه، وجهاز طبي وإداري وجهاز تحليل أداء وكل فرد في المنظومة العظيمة دي”.
“أنا ممتن جدًا جدًا على الفرصة اللي حصلت عليها للانتماء لنادي القرن، رحلة مميزة ومليانة مشاعر مش هتنتهي، لكن الوقت جه إننا نعلن إنتهاء مشواري مع نادي الأهلي بشكل رسمي، بعد رحلة استمرت لمدة ٤ سنين، حصلت فيها على بطولات كتير، وكنت جزء من لحظات كبيرة، لحظات الفوز والانتصار، وحب الجمهور اللي هو أغلى من أي حاجة”.
“شكرًا لكل جمهور الأهلي العظيم، اللي دعم وسند وشجع، وحب من قلبه، وهفضل دايمًا مدين ليكم بدعمكم ليا في كل الأوقات”.
“نادي عظيم، وجماهير رائعة، ومدربين وأجهزة فنية وطبية على أعلى مستوى، شكرًا ليكم على كل لحظة، على كل تشجيع، على كل مرة قلتوا فيها اسمي وهتفتولي، وعلى كل مرة كنتوا سند ليا”.
“قرار الرحيل مش سهل، لكن هي خطوة جديدة في مشواري المهني، عايز أحقق فيها أهداف جديدة، وأكمل رحلتي في مكان تاني، لكن هفضل دايمًا ابن من أبناء النادي، وهفضل دايمًا ممتن وفخور بكل لحظة قضيتها هنا”.
“مفيش كلام يوفي اللي جوايا، لكن بدعي دايمًا إنكم تفضلوا فاكريني بالخير، وتدعولي في خطوتي الجاية”.
“أنا مؤمن إن اللي جاي أحسن بإذن الله، وهفضل دايمًا مستني دعمكم، لأنكم الدافع الوحيد اللي أقدر أكمل بيه، وأحقق بيه اللي بحلم بيه”.
“الأهلي هيفضل دايمًا في قلبي، وهيفضل دايمًا ساعدني على التطور والوصول، وده شيء مستحيل أنساه طول حياتي”.
“هتوحشوني جدًا، وهتفضلوا دايمًا جزء من حياتي اللي بعتز بيه، سـنلـتـفقي مـجـددًا”