وجه محمد الدماطي عضو مجلس إدارة النادي الأهلي، رسالة إلى جماهير الفريق الأحمر بعد فترة من الانتقادات وتراجع نتائج فريق الكرة الأول بالنادي.
وحقق الأهلي الفوز على الزمالك بنتيجة (3-0)، مساء الجمعة الماضي، في الجولة الخامسة من مرحلة التتويج بالدوري المصري.
ويحتل الأهلي المركز الثالث في جدول ترتيب الدوري المصري برصيد 47 نقطة بفارق 3 نقاط عن الزمالك المتصدر وبيراميدز الوصيف.
رسالة الدماطي إلى جماهير الأهلي
كتب الدماطي عبر حسابه الشخصي على موقع التواصل الاجتماعي “فيسبوك”، رسالة إلى جماهير الأهلي.
وأكد الدماطي، أن لا يوجد أحد سعيد بتراجع نتائج الفريق خلال الفترة الأخيرة، مطالباً الجماهير بالالتفاف حول النادي وأن يكونوا على قلب رجل واحد.
وأشار الدماطي في رسالته للجماهير، إلى أن النادي الأهلي منظومة لا تعرف الفشل وسيعود الفريق سريعاً رغم الضغوطات.
وجاء نص رسالة الدماطي كالتالي:
بقالي حوالي شهر ونص قافل الفيسبوك وكل السوشيال ميديا تماما، وامبارح بس فتحت و نزلت صورتي مع الكابتن الخطيب كنوع من الدعم الأدبي لراجل عمل كتير للنادي وبيفضل النادي علي نفسه، وله فضل عليا بعد ربنا إني أكون موجود وأمثل كيان الأهلي العظيم.
وفرصة بما إن في حالة هدوء حتي لو مؤقت أقول كلمتين لعل وعسى يحصل نوع من التوضيح، و كالعادة أنا بتكلم من قلبي وبما يرضي الله ومش بزعل من أي نقد أو تجريح لأني عارف إن دي ضريبة المكان اللي أنا فيه، ولأني متأكد إن النادي الأهلي هو مصدر السعادة يمكن الوحيدة لـ80 مليون بني أدم فطبيعي يحصل زعل، زي لما في أي نجاح بيحصل إشادة، ودايما بقول مش بعرف مهما حاولت استخبي وقت التراجع طالما بظهر وقت النجاح.
مفيش حد أبدا سعيد بالنتائج وده كان واضح جدا في بيان النادي إن في عملية إصلاحات كبيرة هتتنفذ الفترة الجاية، وطبيعي في أي منظومة في العالم، نادي أو شركة أو أي مكان في ضغوطات مستمرة إن يحصل أخطاء نتيجة الضغط ده، الإنسان بطبيعته طول ما هو مضغوط ممكن يغلط، الشطارة إن الأخطاء تبقي قليلة ويتم تداركها سريعا، وأعتقد إن حجم البطولات والإنجازات في الـ8 سنوات أكبر بكتير من حجم الإخفاقات ولكن ده حالنا كنادي أهلي مش بنقبل الإخفاق وده سبب النجاح المستمر لكن ممكن يبقي سبب أحيانا في أخطاء.
الضغط المستمر اللي بيولد أخطاء مش بس على الإدارة، ممكن كمان يكون على المدربين واللاعبين، ممكن الاختيار فنيا يكون سليم لكن قدرة المدرب أو اللاعب على استيعاب حجم المتطلبات و الضغوطات يبقي ضعيف وده بيحصل و طبيعي وشوفناه مع لاعبين كتير سواء لم ينجحوا او قدرتهم على العطاء في أعلي مستوي مكنش فيها استمرارية طويلة، و ممكن يخسرنا مدربين ولاعبين ممتازين بسبب حرصنا المستمر على عدم الإخفاق أو إعطاء فرص.
النادي الأهلي بيستمد قوته من جمهوره، محتاجين الجمهور يبقي كلة علي قلب راجل واحد و هنا مش قصدي الإدارة، قصدي النادي، مش عايزين خناقات وتنمر علي لاعيبه، مش عايزين خناقات فنية علي لاعبين عشان انتصار لوجهة نظر وحب وكره، اللي بيلعب راجل احنا كلنا في ضهره.
عايزين نبص علي الكورة ككورة وكلنا نبقي وحدة واحدة، عندنا مشكلة في المدرج و اتكلمت عليها و كمية الرسايل والشتيمة اللي جتلي مش طبيعية، بس أكدتلي حاجة واحدة إن ده ملف مهم جدا وحساس جدا، ووالله ما حد مقصر، في بس رواسب ومشاكل محتاجة وقت و ثقة من الجميع، مش مهم مين يبقي موجود، مش مهم المسمي، كلنا جمهور الأهلي.
الأهلي كبير وكبير أوي وطالما اختارنا كلنا إن طموحنا يبقي ملوش حدود يبقي لازم نفهم إن ممكن ده يسبب أخطاء وتاني مش بتكلم عن إدارة بس، بتكلم علي لاعيبه ومدربين، وعلى الجمهور كمان، لأن طموحنا الكبير ده خلانا مش بنعرف نفرح عشان دايما باصين لفوق أكتر، أنا في الاخر جمهور وطالع من المدرج وربنا يعلم أنا بحب الأهلي قد ايه، وشايف إن كلنا لازم على قد ما نضغط، يبقى دايما ضغطنا إيجابي ويبقى دايما عامل نجاح.
هنرجع؟ أكيد هنرجع ان شاء الله، النادي الأهلي منظومة مش بتعرف الفشل.
حصل تراجع؟ أكيد حصل وبيحصل والتاريخ بيقول كده وبالعكس على قد ما ضغط الجمهور صعب بس لما الضغط زاد في السنين الأخيرة، العودة بتبقى أسرع وبكتير، شوفنا زمان فترات تراجع أطول وأوحش لما الضغط كان أقل.
اسم الأهلي زي الجبل ما يهزه ريح طول ما الكل حاطط اسم الأهلي قدامه.. أعظم نادي في الكون.